Programación de marzo no Espazo Apego
Arredor do Día Internacional das Mulleres e lembrando tamén o pasado Día Internacional das Mulleres e das Nenas na Ciencia, durante este mes as actividades do Espazo Apego centraranse na igualdade entre mulleres e homes.
Todas as actividades propostas desenvólvense con inscrición previa cubrindo cadanseu formulario. O día anterior sobre as 12 h recibirase un correo coa confirmación da praza, xusto despois de rematar o prazo de inscrición.
A lingua medra
Luns / 17 h / Espazo Apego
Os diferentes contextos da vida teñen o seu espazo cada luns arredor do xogo, da experimentación, do coñecemento… Cada semana o enfoque será diferente: cociñarase no espazo Merendolas; a psicomotricidade será a guía en Movéndonos con Apego; e a ciencia será a protagonista en Experimentamos. De 17 a 19 h para 2-6 anos. O correo de confirmación da praza neste caso recibirase o venres anterior á actividade, ao rematar o prazo de inscrición.
Luns 2. Merendolas
Luns 9. Movéndonos con Apego
Luns 16. Merendolas
Luns 23. Experimentamos
Luns 30. Experimentamos
Tardes de contos
Martes / 17 e 18.15 h / Espazo Apego
Un tempo para entrar nos contos e imaxinar a partir deles, aprendendo cada vez máis palabras para entender o mundo. As actividades desenvólvense cada semana arredor dun centro de interese diferente, arredor dunha temática mensual e en dous horarios: de 17 a 18 h para 0 a 3 anos e de 18.15 a 19.15 h para 3 a 6 anos.
Martes 3
Martes 10
Martes 17
Martes 24
Martes 31
Enredando e lingoretando
Mércores / 17 h / Espazo Apego
Un espazo de entretemento activo arredor do xogo, libre ou guiado. A socialización en galego é o obxectivo e a imaxinación e os valores da amizade e a cooperación serán as ferramentas. A actividade contará con dous grupos diferenciados: para 3-6, sen acompañamento dunha persoa titora, e para 0-3 con acompañamento. Nos dous casos o horario será de 17 a 19 h. Iranse incorporando temas e materiais relacionados coas festividades, o medio natural, a contorna inmediata etc., para propiciar a interacción.
Mércores 4. Xogamos coas palabras
Mércores 11. Fabricamos xoguetes
Mércores 18. Imos ao patio
Mércores 25. Xincana de palabras
Tachán!
Dous xoves do mes/ 18 h / Espazo Apego
Contactamos co acervo e a cultura mediante a oferta de espectáculos ou contidos executados por especialistas e en diversos formatos.
Xoves 12. “Vai frío!”, de Iván Dávila (de 1 a 4 anos)
Contos fresquiños para a cativada máis cativa onde, a través dos estímulos visuais, auditivos e espaciais, entrarán en calor coas historias máis fascinantes e os personaxes máis delirantes. Os libros en que se basea o espectáculo: Mamá pingüín é a mellor (Chris Haughton), Imos cazar un oso (Michel Rosen) e Unha eiruga moi larpeira (Eric Carle).
Xoves 26. “Cambia o conto”, de Música Miúda (de 3 a 6 anos)
Concerto-contacontos en formato dúo, onde se traballan os estereotipos de xénero a partir de contos tradicionais. Descubriremos as verdadeiras historias de Carapuchiña e da Pequena Serea e tamén de novos personaxes como o Pirata Efrén e a Avoa Lola. Espectáculo interactivo con cancións orixinais do disco Cambia o conto.
As actividades do programa Apego xa teñen os formularios de inscrición abertos!