O Apego en xuño
En xuño xa devecemos por facer algunha viaxe… Sabedes que no web do Apego hai un xogo para cando imos en coche e tamén moitos máis recursos? Falta moito? pode servirnos para que os traslados non se fagan tan longos e para pasarmos bos momentos sen pantallas!
A proposta de actividades ordinarias para este mes no Espazo Apego vaise completar cun concerto no mesmo lugar e cunha obra de teatro en colaboración coa Xunta de Galicia no CSC de Santa Marta. Non esquezades inscribirvos!
Tardes de contos
Martes / 17 e 18.15 h / Espazo Apego
Un tempo para entrar nos contos e experimentar a partir deles, aprendendo cada vez máis palabras para entender o mundo. As actividades desenvólvense cada semana arredor dun centro de interese diferente e en dous horarios: de 17 a 18 h para 0-3 anos e de 18.15 a 19.15 h para 3 a 6 anos. Este mes centrarase a atención na diversidade e no respecto cara ás individualidades das persoas, pois todas e todos somos seres únicos e irrepetibles, con moitas cousas que compartir e das que aprender.
Martes 6. Monstro azul
Martes 13. Os meus veciños
Martes 20. Con Tango somos 3
Martes 27. Elmer
Enredando
Mércores / 17 h / Espazo Apego
Un espazo de entretemento activo arredor do xogo, libre ou guiado. A socialización en galego é o obxectivo e a imaxinación e os valores da amizade e a cooperación serán as ferramentas. A actividade contará con dous grupos diferenciados: para 3-6, sen acompañamento dunha persoa titora, e para 0-3 con acompañamento. Nos dous casos o horario será de 17 a 19 h. Iranse incorporando temas e materiais relacionados coas festividades, o medio natural, a contorna inmediata etc., para propiciar a interacción.
Mércores 7
Mércores 14
Mércores 21
Mércores 28
Conssertasso na horta, con Brais das Hortas (+ 3 anos)
Xoves 15 / 18 h / Espazo Apego
Conssertasso na horta é un ha viaxe pola horta musical de Brais das Hortas, polas súas loucuras e polas súas fantasías. Un feixe de personaxes e de cancións de músicas diversas (reggae, ska, punk, hip-hop, rock, soul, trap…) para reivindicar con alegría e amor a vida e a rebeldía da nosa horta.
Cubo, con Elefante Elegante (+ 4 anos)
Venres 30 / 18 h / Centro Sociocultural Santa Marta
Nun misterioso cubo de madeira, dous personaxes moi diferentes son quen de vivir en harmonía. Ela é curiosa e decidida, el é tenro e vulnerable. Xogan, divírtense e rin, pero un día ela decide ir máis aló… Cubo é un xogo e un xoguete cheo de fantasía, humor e poesía visual nun espazo teatral para a infancia.
Colaboración do programa Falaredes da Xunta de Galicia
Un mes para facer unha pequena excursión e para entreternos no Espazo Apego!