A igualdade na programación do Espazo Apego en marzo
Arredor do Día Internacional da Muller e lembrando tamén o pasado Día Internacional da Muller e da Nena na Ciencia, durante este mes entroideiro as actividades do Espazo Apego centraranse na igualdade entre mulleres e homes. O primeiro luns deste mes elaboramos uns foguetes especiais para voarmos moi altas en Merendolas! e no terceiro recibiremos a visita dunha entidade que traballa pola nosa cultura no Quen vén? deste mes. Ademais, os xoves deste mes estarán protagonizados por nenas fortes e apoderadas que nos ensinarán que un mundo máis xusto e igualitario é posible.
Todas as actividades propostas se desenvolven con inscrición previa cubrindo cadanseu formulario. O día anterior sobre as 12 h recibirase un correo coa confirmación da praza, xusto despois de rematar o prazo de inscrición.
Obradoiros de Entroido
Xoves 6 de marzo / 17 e 18.30 h / Espazo Apego
No Espazo Apego tamén haberá oco para o Entroido o xoves 6 de marzo con dous obradoiros dirixidos a crianzas entre os 5 e os 11 anos e así participaren nas festas máis tradicionais da nosa comarca cos galanos máis feitos e coas mellores coplas e vivas na nosa lingua.
17.00 h Obradoiro de chapeus (de 5 a 11 anos)
Para vestir as festas do Entroido con moito estilo, cada crianza elaborará un chapeu de seu como o que usan as xeneralas e xenerais da Ulla nos seus atranques con materiais sinxelos e enfeites personalizados.
18.30 h Obradoiro de atranques (de 5 a 11 anos)
Coñeceremos o Entroido da Ulla e cantaremos vivas e atranques con cabaliños de goma e espadas imaxinarias. As crianzas sentiranse protagonistas desta festa e recoñecerán os elementos principais dos atranques: personaxes, coplas, vivas, humor etc., aprendendo estruturas básicas da oralidade e compoñendo as súas propias vivas e estrofas.
A lingua medra
Luns / 17 h / Espazo Apego
Os diferentes contextos da vida teñen o seu espazo cada luns arredor do xogo, da experimentación, do coñecemento… Cada semana o enfoque será diferente: cociñarase no espazo Merendolas; a psicomotricidade será a guía en Movéndonos con Apego; realizaremos unha actividade interxeracional cunha visita especial en Quen vén?; e a ciencia será a protagonista en Experimentamos. De 17 a 19 h para 2-6 anos. O correo de confirmación da praza neste caso recibirase o venres anterior á actividade, ao rematar o prazo de inscrición.
Luns 3. Merendolas: Foguetes moi especiais
Luns 10. Movéndonos con Apego
Luns 17. Quen vén?
Luns 24. Experimentamos
Luns 31. Experimentamos
Tardes de contos
Martes / 17 e 18.15 h / Espazo Apego
Un tempo para entrar nos contos e imaxinar a partir deles, aprendendo cada vez máis palabras para entender o mundo. As actividades desenvólvense cada semana arredor dun centro de interese diferente, arredor dunha temática mensual e en dous horarios: de 17 a 18 h para 0 a 3 anos e de 18.15 a 19.15 h para 3 a 6 anos.
Martes 4
Martes 11
Martes 18
Martes 25
Enredando e lingoretando
Mércores / 17 h / Espazo Apego
Un espazo de entretemento activo arredor do xogo, libre ou guiado. A socialización en galego é o obxectivo e a imaxinación e os valores da amizade e a cooperación serán as ferramentas. A actividade contará con dous grupos diferenciados: para 3-6, sen acompañamento dunha persoa titora, e para 0-3 con acompañamento. Nos dous casos o horario será de 17 a 19 h. Iranse incorporando temas e materiais relacionados coas festividades, o medio natural, a contorna inmediata etc., para propiciar a interacción.
Mércores 5. Xogamos coas palabras
Mércores 12. Fabricamos xoguetes
Mércores 19. Imos ao patio
Mércores 26. Xincana de palabras
Tachán!
Dous xoves do mes/ 18 h / Espazo Apego
Contactamos co acervo e a cultura mediante a oferta de espectáculos ou contidos executados por especialistas e en diversos formatos.
Xoves 13. “Laura e a randeeira espacial, de Rocío Ovalle (de 3 a 6 anos)
Laura é unha nena forte e curiosa que quere ser astronauta e ten unha randeeira coa que cada quen chega tan alto como é capaz de soñar.
Esta actividade contará con dúas partes: primeiro unha contada e deseguido, a través da historia de Laura, realizaremos un mapa cara aos nosos soños.
Xoves 27. “Lúa triangular. Nada é imposible”, de Jara Ortiz (de 2 a 6 anos)
Neste espectáculo de contacontos musical, baseado no libro Marta e a píntega da autora Eli Ríos, a nena Marta coñece á píntega Oli e xuntas viaxan ao Mundo dos Contos, ao que, grazas a unha morea de aventuras, transforman nun lugar mellor: máis diverso e máis xusto, onde as princesas dos contos poden ser felices ao crearen e visibilizaren as súas propias historias.
O público participará de maneira activa e creativa a través das cancións coa voz e a percusión de Jara Ortiz, nunha mestura de música e teatro co humor, a literatura e a muiñeira desde a perspectiva de xénero.
Arredor do Día Internacional da Muller e lembrando tamén o pasado Día Internacional da Muller e da Nena na Ciencia, durante este mes entroideiro as actividades do Espazo Apego centraranse na igualdade entre mulleres e homes.