Entrega dos VII Premios Enreguéifate

O Teatro Principal de Santiago de Compostela acolleu o 3 de abril a entrega dos VII Premios Enreguéifate. O  proxecto colaborativo Enreguéifate, desenvolvido polos concellos de Ames, Carballo, Pontevedra, Santiago de Compostela e Teo impulsa a difusión da improvisación oral en verso: a regueifa.

Máis de 300 persoas asistiron á entrega dos premios aos vídeos de regueifas escollidas neste certame do curso 2023-2024. A gala foi conducida polas regueifas de Manolo Maseda (mestre, músico e regueifeiro), Séchu Sende (mestre, escritor e regueifeiro), Lupe Blanco (regueifeira), Josinho da Teixeira (regueifeiro) e Nuria das Cruces (regueifeira). Tampouco faltou a música que achegou a Orquestra da Regueifa, formada por alumnado do IES do Milladoiro de Ames e do IES Antonio Fraguas de Santiago de Compostela.

O Enreguéifate, neste curso 2023-2024, incluíu obradoiros de formación para profesorado e alumnado dos cinco concellos organizadores, ademais do certame de regueifas en vídeo cuxos premios se veñen de entregar. Así, a entrega dos regueipremios ponlle o ramo á sétima edición do certame en que se recibiron un total de 56 vídeos chegados das catro provincias galegas (Ames, Carballo, Pontevedra, Santiago de Compostela, Teo, Vigo, Vilalba, A Coruña, Viana do Bolo, Melide, Vila de Cruces ou Dodro...). O xurado outorgou os seguintes premios:

Categoría Xeral 

• A máis brava: Arrieiro e Chaminho (Malpica e A Coruña) -  "Cumbia do choque" 
• A máis aguda: Escola de regueifa de Carballo - "Vai de voda" 
• A máis diversa: Teiseiros regueifeiros (Vigo) - "Regueifa pola saúde mental" 
• A máis reivindicativa: Iván e Aroa (Teo) - "Regueifa de coidar a terriña"
• A mellor falada: As da muiñeira (Coristanco) - "Os deberes" 
• A mellor cantada: Grupo Xuvenil da Terceira Idade de Poio - "Sempre vida" 

Categoría Escolar 

• A máis brava: Os máis bravos, do CEIP de Bormoio-Agualada (Coristanco) - "Queremos moito as nosas profes" 
• A máis aguda: Regueifeirxs da Chá, do IES Basanta (Vilalba) - "Regueifando apréndese mellor" 
• A máis diversa: Clase de 2º B do CEIP Quiroga Palacios (Santiago de Compostela) - "O noso Entroido" 
• A máis reivindicativa: Clase de 6º do CEIP Plurilingüe Santa María do Castro de Cabo de Cruz (Boiro) - "O granulado non é pasado" 
• A mellor falada: Regueifeiros de Razo, do CEIP Plurilingüe Nétoma-Razo (Carballo) - "Regueifa en Razo" 
• A mellor cantada: Regueifeiras do Camballón do IES Marco do Camballón (Vila de Cruces) - "A nosa música na nosa voz" 
• Accésit á máis inclusiva: Noa e Martín, do IES Antonio Fraguas (Santiago de Compostela) - "Todo isto son mentiras"

Os galardóns desta sétima edición, que levaba por lema "Temos madeira regueifeira!", tiveron selo estradense, con pezas creadas polas irmás artesás Isabel e Ana Neira (Atalanta Madeira).

No acto de entrega participaron, ademais das persoas premiadas, alumnado de varios centros escolares galegos, as técnicas dos servizos de normalización lingüística e unha representación política dos concellos impulsores da iniciativa, entre os cales a alcaldesa de Santiago de Compostela, Goretti Sanmartín, o alcalde de Ames, Blas García e a alcaldesa de Teo, Lucía Calvo, tomaron parte tamén como entregadoras e entregador de parte dos galardóns.