Actividades do Apego en maio
Maio en Compostela é sinónimo de festa! A Ascensión vístenos de roupa nova e sácanos a bailar. Unha proposta para as persoas miúdas amantes dos animais pode ser visitarmos con elas a feira de Amio. Ver os cabalos de preto halles impactar! E para o resto do mes… velaquí as propostas no Espazo Apego.
Tardes de contos
Martes / 17 e 18.15 h / Espazo Apego
Un tempo para entrar nos contos e experimentar a partir deles, aprendendo cada vez máis palabras para entender o mundo. As actividades desenvólvense cada semana arredor dun centro de interese diferente e en dous horarios: de 17 a 18 h para 0-3 anos e de 18.15 a 19.15 h para 3 a 6 anos. Este mes o tema central vai ser o medo e a importancia de sentírmonos protexidas e comprendidas, de compartirmos tempos en familia e con amizades para xerar apego e amañar os problemas que, ás veces, non o son tanto.
Martes 2. Un gato e os monstros
Martes 9. Outro monstro!
Martes 16. En familia
Martes 23. Cociñamos
Martes 30. Unha mosca chosca
Enredando
Mércores / 17 h / Espazo Apego
Un espazo de entretemento activo arredor do xogo, libre ou guiado. A socialización en galego é o obxectivo e a imaxinación e os valores da amizade e a cooperación serán as ferramentas. A actividade contará con dous grupos diferenciados: para 3-6, sen acompañamento dunha persoa titora, e para 0-3 con acompañamento. Nos dous casos o horario será de 17 a 19 h. Iranse incorporando temas e materiais relacionados coas festividades, o medio natural, a contorna inmediata etc., para propiciar a interacción.
Mércores 3
Mércores 10
Mércores 24
Mércores 31
C@nto contigo, con Paco Nogueiras (+ 3 anos)
Xoves 11 / 18 h / Espazo Apego
Paco Nogueiras fainos sacar a lingua a voar cos grandes éxitos dos seus traballos musicais Brinca Vai!, Radio Bule-Bule e Extra! Nos temas que son xa clásicos na música infantil galega hai retrousos e melodías para participar activamente, bailando sen complexos, acompañando coa voz, coas palmas ou con acenos. A música e o humor xúntanse nunha festa moi especial onde as crianzas son as protagonistas.
Trispilistriñas, con Pavís Pavós (0-3 anos)
Xoves 27 / 18 h / Espazo Apego
Tareixa Alonso e Xacobe Rodríguez, Pavís Pavós, teñen unha maleta repleta de contos, cantos, arrolos e xogos recuperados da tradición oral para os bebés e as súas familias.
Trispilistriñas trispilistriñas o que non come non ten barriguiñas,
trispilistrolas trispilistrolas o que non come non ten barrigolas.
Un mes de festa con moito Apego!