Actividades do Apego en abril
A proposta de actividades do mes de abril no Espazo Apego xa está dispoñible e... ademais, unha recomendación neste mes dos libros. Deámoslle importancia á lectura desde que nacen, con isto fomentaremos as habilidades lingüísticas, o interese polo coñecemento, o incremento da concentración e tamén desenvolveremos a súa imaxinación e creatividade.
Todas as actividades propostas desenvólvense con inscrición previa cubrindo cadanseu formulario. O día anterior sobre as 12 h recibirase un correo coa confirmación da praza, xusto despois de rematar o prazo de inscrición.
A lingua medra
Luns / 17 h / Espazo Apego
Os diferentes contextos da vida teñen o seu espazo cada luns arredor do xogo, da experimentación, do coñecemento… Cada semana o enfoque será diferente: cociñarase no espazo Merendolas; a psicomotricidade será a guía en Movéndonos con Apego; recibiremos especialistas en Quen vén?; e a ciencia será a protagonista en Experimentamos. De 17 a 19 h para 2-6 anos. O correo de confirmación da praza neste caso recibirase o venres previo á actividade, ao rematar o prazo de inscrición.
Luns 8. Merendolas
Luns 15. Movéndonos con Apego
Luns 22. Quen vén?
Luns 29. Experimentamos
Tardes de contos
Martes / 17 e 18.15 h / Espazo Apego
Un tempo para entrar nos contos e imaxinar a partir deles, aprendendo cada vez máis palabras para entender o mundo. As actividades desenvólvense cada semana arredor dun centro de interese diferente, arredor dunha temática mensual e en dous horarios: de 17 a 18 h para 0-3 anos e de 18.15 a 19.15 para 3 a 6 anos. Este mes toca igualdade.
Martes 2
Martes 9
Martes 16
Martes 23
Martes 30
Enredando e lingoretando
Mércores / 17 h / Espazo Apego
Un espazo de entretemento activo arredor do xogo, libre ou guiado. A socialización en galego é o obxectivo e a imaxinación e os valores da amizade e a cooperación serán as ferramentas. A actividade contará con dous grupos diferenciados: para 3-6, sen acompañamento dunha persoa titora, e para 0-3 con acompañamento. Nos dous casos o horario será de 17 a 19 h. Iranse incorporando temas e materiais relacionados coas festividades, o medio natural, a contorna inmediata etc., para propiciar a interacción.
Mércores 3. Xogamos coas palabras
Mércores 10. Fabricamos xoguetes
Mércores 17. Imos ao patio
Mércores 24. Xincana de palabras
Tachán!
Un xoves cada quince días contactamos co acervo e a cultura mediante a oferta de espectáculos ou contidos executados por especialistas e en diversos formatos.
Tralará de Marta Ortiz (0-4 anos)
Xoves 4 / 18 h / Espazo Apego
Na estrea do seu novo espectáculo, Marta Ortiz xunta contos, cantigas e obxectos e tráenolos con moito ritmo ao Espazo Apego! Contos de antes e de agora, cun pé para adiante e outro para atrás, bailando entre a tradición e a actualidade. Tralará ten o ritmo no corpo, cos cantos e cos refráns, retrousos e rimas, xogos de palabras e contos versados.
O lobo feliz de Miguel Guido (+3 anos)
Xoves 18 / 18 h / Espazo Apego
É tempo de lobos que buscan a felicidade ouveándolle á lúa. Un contacontos con música e moito humor, baseado no libro do mesmo nome e contado polo seu autor, Miguel Guido.
Un abril de actividades e libros