O Colexio La Salle de Santiago pasa á fase final do Club de Debate Alingua

O IES Terra de Xallas de Santa Comba e o colexio La Salle de Santiago quedaron en primeira posición cun premio de 800 € e en segunda posición cun premio de 500 €, respectivamente, na segunda xornada da fase previa desenvolta en Ribeira do Club de Debate Alingua.

A edición 2025 deste proxecto, de que o Concello de Santiago é organizador entre outras entidades, reúne 32 equipos procedentes dun total de 20 institutos dunha ducia de concellos galegos. Case 300 mozas e mozos demostraron a súa habilidade coas palabras ao longo da fase previa na procura dun oco na final. Ademais do colexio La Salle, o noso concello estivo tamén representado na xornada deste luns por tres grupos de debate do IES Xelmírez I e do Colexio Plurilingüe Nosa Señora dos Remedios, que, aínda que non pasaron á fase final, fixeron un grandísimo traballo.

Vilagarcía de Arousa será o 26 de abril a sede da fase final, onde se reunirán os primeiros e segundos clasificados das catro xornadas da fase previa: o IES Canido, de Ferrol, o CPR Santiago Apóstolo, de Narón, IES O Carril e CPR Plurilingüe Sagrada Familia (Filipenses), ambos de Vilagarcía de Arousa, CPR Plurilingüe Galaxia, de Ribeira, e o IES Luis Seoane, de Pontevedra, xunto co IES Terra de Xallas, de Santa Comba, e o colexio compostelán La Salle.

Entre as propostas realizadas polos propios centros educativos participantes, o turismo foi o tema elixido para estas fases clasificatorias na edición 2025, que se desenvolveron durante catro xornadas entre Narón e Ribeira. “A masificación turística é un problema en Galicia” foi a afirmación sobre a que debateron os equipos e durante cada unha das xornadas cada participante debateu en dúas quendas, unha “a favor” e outra “en contra” da tese proposta, e un xurado integrado por cinco profesionais de diversas áreas valorou as intervencións dos equipos.

O proxecto Club de Debate Alingua

Este programa colaborativo que promove e valora o uso oral do galego, o espírito crítico, a tolerancia e o traballo en equipo na mocidade está promovido pola Asociación de Entidades pola Lingua Galega (Alingua), e na súa edición 2025 está apoiada polos concellos de Carballo, Dodro, Ferrol, Narón, Pontedeume, Pontevedra, Ribeira, Rois, Santa Comba, Santiago de Compostela, Teo e Vilagarcía de Arousa.

É unha actividade dirixida a mellorar as destrezas orais da mocidade en contextos formais e informais, fomentar a investigación e a reflexión e o debate sobre temas de actualidade. Ademais, de xeito especial, o Club de Debate Alingua organiza tamén dinámicas de interacción que mesturan o alumnado dos diversos equipos participantes ao longo das xornadas competitivas, co obxectivo de fomentar o espírito deportivo, a solidariedade, responsabilidade e compañeirismo.

A iniciativa diríxese ao alumnado de 3.º e 4.º de ESO e 1.º de bacharelato, ou cursos equivalentes dos ciclos formativos, dos concellos participantes. Os equipos están formados por grupos mixtos (entre 4 e 10 membros) e conta cun ou cunha profesora que se encarga de adestrar, asesorar e representar o equipo.

Os equipos gañadores das fases previa e final obteñen premios cos que acceden a contidos culturais ou a experiencias de convivencia e animación lingüística.