Galegoempresas

#galegoempresas é unha plataforma web para visibilizar e aumentar o uso do galego no sector socioeconómico compostelán.

Pretende facilitar a localización de empresas que ofrecen servizos en galego na contorna de Compostela e achegarlles maior difusión. 

As empresas poden incorporarse cun procedemento sinxelo: deben cubrir un formulario de autodiagnose e, unha vez que sexa validado, completar toda a información útil para presentar a súa empresa (logo, enderezo, descrición, imaxes, ligazón á web, redes sociais).  A partir dese momento, a súa ficha está dispoñible para o público cunha valoración da porcentaxe de uso do galego que ofrecen, desagregada por ámbitos.

Calquera persoa que consulte a páxina pode realizar a súa busca pola localización xeográfica, por sectores de actividade ou simplemente polo seu nome para atopar rapidamente a empresa ou empresas que poden satisfacer a súa demanda cun plus de comunicación na nosa lingua.

Ademais das fichas de empresas e da información necesaria para incorporarse, a web de #galegoempresas facilita o acceso a algúns recursos lingüísticos en liña e complétase cun pequeno argumentario a prol do uso do galego neste ámbito.

O comercio local sabe de que fala

O comercio local achega valores que non é posible atopar noutras canles: proximidade, confianza, experiencia, calidade...

Co fin de contribuír a achegarlle á cidadanía este 'saber facer', que é tamén un servizo que só nos fornecen os negocios máis próximos, iniciouse unha liña de creación e difusión de videoconsellos do comercio local, do comercio que nos entende e fala coma nós.

As pezas vanse publicando a través de Youtube para que cheguen ao maior número de persoas e divúlganse tamén nas páxinas do Departamento de Comercio e de #galegoempresas, vinculadas coa campaña #EuMercoAquí. Nelas podemos atopar respostas e pequenos consellos sobre as materias máis diversas que atenden o noso comercio.