Coñecermos a historia do galego paseando por Santiago de Compostela

Compostela e as orixes da lingua é un paseo lingüístico sobre as orixes da cidade e a súa relación co galego, cuxo obxectivo é divulgar, de xeito ameno, a orixe e diversidade do desenvolvemento do noso idioma. Con este programa, promovido polo Departamento de Lingua Galega do Concello de Santiago de Compostela, preténdese fomentar unha reflexión sobre o potencial do galego na sociedade de hoxe en día.

Os paseos están dirixidos ao público adulto xeral e ao alumnado de 4.º da ESO e 1.º e 2º de BAC e cada andaina está organizada para grupos de 30 persoas como máximo, que durante 2 horas aproximadamente percorren a zona vella da cidade mentres descobren os vestixios das linguas que conformaron o noso idioma, a súa evolución e a situación actual.

Alumnado da Escola de Idiomas de Santiago de Compostela, de institutos de ensinanza secundaria composteláns e doutros puntos de Galicia, ademais de entidades como a Coordinadora de Traballadores/as de Normalización da Lingua (CTNL) ou a Asociación Galega de Profesionais da Tradución e da Interpretación (AGPTI) desfrutaron xa neste ano desta ruta que comeza na praza da Pescadería Vella e remata na de San Fiz de Solovio, apoiándose en diferentes recursos para facilitar a contextualización e a audición.